【有片】多蒙特95分钟逼和拜仁 简尼嬲到碌落櫈

xcy232323

       

        周日(9日)凌晨德甲重头戏，多蒙特主场同拜仁慕尼黑合演超级激战，「蜜蜂兵团」喺落後2球劣势下，最後阶段上演绝地大反击，并凭老将莫迪斯迪喺补时5分钟最後一击顶入，主场2比2逼和拜仁，拜仁CEO简尼喺看台嬲到几乎碌落櫈！
        两大德甲劲旅今场势均力敌，拜仁33分钟第1次中龙就有收获，哥列斯卡禁区顶放冷箭得手，53分钟拜仁重施故技，利莱辛尼又喺禁区顶远射建功。多蒙特未有放弃，最後阶段展开大反击，尤素法莫高高74分钟追番1球，亦令佢以17岁322日之龄，成为呢场「德甲打吡」史上最年轻入球者。
        拜仁尾段全军退守，90分钟出现转捩点，法国翼锋京士利高文防守嗰阵情急踢跌对手，两黄一红被逐离场，多蒙特去到95分钟最後一击，连龙门都杀埋上前场帮手，结果後备上阵嘅莫迪斯迪喺远柱头槌顶入，追成2比2平手完场，喺看台睇波嘅拜仁CEO简尼嬲爆怒吼，几乎碌埋落櫈。
        拜仁教练拿高斯文赛後表示：「呢个系公平嘅赛果，我哋本来有好多机会杀死对手，但系防守差劲顶唔住。呢个结果令人心痛，但亦系球队应得嘅结果，我哋应该防守得更好。」拜仁今场失分兼折将，後防艾方素戴维斯今场被踢伤头疑似脑震荡，被换出後送入医院检查。