C朗威番铺！球会生涯第700球率曼联反胜

xcy232323

       

        今季表现低迷嘅C朗拿度，周一(10日)凌晨英超临危受命即做赢波英雄，佢後备上阵攻入今季英超开斋波，带领曼联作客2比1反胜爱华顿，升上联赛第5名位置。C朗入波後更创下里程碑，成为足球史上首个喺球会生涯入700球嘅球员，成就解锁！
        曼联今场用安东尼马迪尔挂帅，呢位法国前锋赛前热身一度受伤，但仍然顶住上，曼联开波5分钟就失守，卡斯米路後场断缆造就伊禾比轰入世界波。曼联15分钟扳平，安东尼马菲奥斯接应安东尼马迪尔直线，右路乖巧熨射追成1比1。
        踢到29分钟安东尼马迪尔因伤退下火线，C朗临危受命上阵，佢喺41分接应卡斯米路妙传，左路快放杀入禁区射入，呢球系佢今季英超开斋波，亦系佢球会生涯第700个入球，成为史上第1人。爱华顿下半场群起反扑，但曼联最後成功坚守2比1胜果。
        曼联领队坦哈格赛後预言C朗将入球大爆发：「700球系个伟大成就，我戥佢开心，而且呢球系佢今季第1个英超入波，呢个射手都需要入球嚟重拾感觉，当佢哋射入第1球，之後就会陆续有来。」C朗700个球会入球当中，曼联占144球、皇马有450球、祖云达斯101球同士砵亭5球。