【有片】C朗无私奉献2助攻 手术刀式妙传技惊四座

xcy232323

       

        葡萄牙巨星C朗加盟沙特阿拉伯球队艾纳斯後，表现愈来愈好，继上轮联赛入4球之後，喺周五(17日)深夜又有佳作，一改「独食」作风，贡献2次助攻，包括1次手术刀式妙传，帮艾纳斯主场以2比1击败艾塔亚文。
        虽然C朗今场冇波入，但演出仍然非常抢镜，开赛17分钟，呢位38岁老将喺接近中线位置，以一记精准传送，造就队友加列比单刀射入。
        虽然换边後初段，艾纳斯被对手扳平1比1，但C朗又发挥救世主角色，战至78分钟，佢喺门前攞到波，但并冇自己射门，而系回传畀位置更佳嘅队友阿卜杜拉马度射成2比1。
        翻查C朗对上1次单场贡献2次助攻，已经系2018年9月29日协助祖云达斯以3比1击败拿玻里。
        赛後网民大赞C朗第1球传波实在太精彩，认为佢传送及助攻能力，不亚於宿敌美斯，亦有人认为C朗终於肯转型，更多为队友铺桥搭路，对於佢自己及艾纳斯都系好事。
        C朗今仗踢足全场，除咗有2次助攻之外，仲有4次射门，其中3次中目标，并创造4次入波机会，佢5次尝试扭过对手，有3次成功，获评为今场表现最佳球员。