麦巴比同皇马签秘密协议 PSG踢出集训大军

xcy232323

       

        基利安麦巴比转会闹剧有爆炸性发展，呢位法国前锋周六(22日)凌晨为巴黎圣日耳门(PSG)喺热身赛入波，点知随後惊爆同皇家马德里有秘密转会协议，下年以自由身过档。PSG得悉後非常震怒，即时将佢踢出准备展开嘅亚洲之旅集训大军，而且正式将麦巴比挂牌出售，如果佢坚持唔转会同唔续约，新球季会被「封杀」长坐冷板。
        麦巴比上月以正式信件通知PSG唔会续约，再次引爆转会风波，主席艾卡理化已表明「一系续约、一系即刻走」，唔会容许佢下年约满免费离队嘅事情发生。据报麦巴比上星期归队操练後，艾卡理化亦向全队演说，不点名表明：「唔想留队嘅人，离开大门随时打开。」
        PSG周六进行首场季前热身对勒哈弗尔，麦巴比喺半场上阵即有入波，助球队赢2比0，为新上任嘅安历基拎到首场胜仗，不过随後法国《队报》爆出猛料，麦巴比已同皇马达成秘密协议，等佢明年夏天完成合约拎到1亿欧元(约8.7亿港元)嘅「忠诚奖金」後，会再收1.6亿欧元(约13.93亿港元)签字费以自由身加盟皇马。
        PSG踢完今场之後，大军会飞去日本、南韩踢多4场热身赛，秘密协议消息爆出後，PSG即时将麦巴比踢出集训大军，而且会即刻将佢挂牌，出价最高嘅球会将会被接纳，曼联、利物浦同车路士过去都曾经同麦巴比传出绯闻，而皇马亦有机会提前出手。
        据《The Athletic》同《ESPN》等媒体报道，PSG立场坚决，如果麦巴比拒绝喺夏天转会，新球季亦唔会获得上阵机会。PSG喺2017年用1.8亿欧元(约15.67亿港元)向摩纳哥收购麦巴比，如果呢位24岁前锋最终自由身离队，PSG将血本无归。