马体会赢2比0 祖奥菲历斯最後入波？

xcy232323

       

        周五(30日)凌晨西甲赛事，马德里体育会主场2比0击败艾尔切，盛传1月将会离队嘅葡萄牙前锋祖奥菲历斯，今场正选挂帅兼为球队先开纪录，教练施蒙尼赛後未有保证唔卖祖奥菲历斯，强调「如果」佢踢番世盃嘅水平，会系好重要嘅球员。
        祖奥菲历斯今季喺马体会未受重用，世盃前只踢过5场西甲正选，不过今仗就拍住基沙文同艾华路莫拉达上阵。艾尔切中坚干沙路华度上半场补时拉跌单刀嘅艾华路莫拉达被出示红牌，马体会守将马里奥靴莫素亦喺53分钟拎第2面黄牌被逐。双方10人应战下，祖奥菲历斯56分钟近门顶打破僵局，艾华路莫拉达74分钟射成2比0，艾尔切完场前再有杜明高斯昆拿食红牌，最後9人应战下输0比2。
        英国传媒报道，祖奥菲历斯经理人佐治文迪斯，正同曼联、阿仙奴、车路士进行交涉，希望1月转会窗可以登陆英超，但马体会索取半年900万欧元嘅借用费，被指太高而次谈判陷入僵局。马体会教练施蒙尼赛後表示：「冇证据话祖奥菲历斯一定会走，我依家只系专注於解决每日嘅问题，拣选我认为可以赢波嘅球员，如果祖奥菲历斯可以踢出世盃期间嘅水平，佢会系球队重要成员。」