皇马A米「细」纪战 免费台有直播

xcy232323

       

        将於周一(24日)早上喺美国举行嘅热身赛，由皇家马德里硬撼AC米兰。两队都开操冇耐未上力，加上各有主力离队，火力下降，今仗唔慌多波入，随时闷战一场。（HOY TV 77台周一早上10时直播）
        两队系上届欧联4强分子，不过大家都系开操冇耐，今仗先系皇马今夏首仗热身赛，而「红黑军团」日前亦只系打咗一场，大胜弱旅隆美辛尼6比0，但对手太弱不能作准，状态未弗。「银河舰队」今夏有英格兰中场新星比宁咸加盟，不过队长兼王牌射手宾施马就去咗沙特掘金，转投伊蒂哈德，呢位老将唔单止士哥不断，亦擅於为队友铺桥搭路，冇咗佢对进攻有一定影响。
        A米之前大地震，传奇名宿兼总监马甸尼因与大股东意见分歧而被炒，老将伊巴谦莫域亦告挂靴，连中场核心辛度东拿利都被卖去纽卡素，之後接连低价买入基斯甸普列锡、罗夫度斯卓克等车仔弃将，阵容重新洗牌，啱唔啱用就未知，但肯定需要时间磨合。
        既然双方都未弗，今仗又只系表演赛性质，志在寓赛於操，希望慢慢提升状态，相信大家都系踩吓场搵番啲比赛感觉，唔会搏命，加上近3次热身赛碰头，亦有两次互交白卷，预计今仗唔慌多波入。